為甚麼我們還未發達?

為甚麼我們還未發達?
如果你問人發達的方程式是甚麼? 十個有九個都會答: 「長揸優質股囉!」 這幾乎是全人類的常識。下一個問題, 既然方程式人人都識, 點解個個人都呻窮而未發達?.

下面的例子應該有點啟示：
1997年 –
甲:　「買中移動(941)啦，大陸的手機市場大到嘔呀！十年的盈利會翻２０倍」
乙：　「你都癡嘅，大陸人窮到嘔，邊度有咁多人有錢買手機呀？買層樓炒下好過啦！」
1997年底中移動股價13.25元。

2000年 -
甲: 「諗下隻思捷(330), 個brand做得幾好喎, 好似Peter Lynch種意果D哩, 果D10-baggers哩」　
乙：「Sucks! 做實業邊有發達? 依家乜嘢年代呀大佬? As Bill Gates said, Business @ the Speed of Thought呀! 你un唔un呀! 一睇Richard就知道佢一表人才啦, 依鋪發達就靠Richard啦」
2000年思捷低位3.7元, 電盈(8)高位60.6元。

2003年 -
甲:「中國人壽(2628)將來必成中國壽險業的龍頭, 我實長揸不放啦」　
乙：「太冒險啦。中國人壽PE太高啦, 匯豐, 花旗同AIG果D先至穩建之選麻。匯豐5年必定見200甚至400元, 駛乜買D大陸股呀?」
2003年中國人壽3.62元

2007年 -
甲:「騰訊(700)個QQ係好嘢嚟, 利潤復合增長率30-50%無難度, 依次掂硬啦」 乙：「 乜Q係QQ呀? 計我話買齊匯豐、中人壽同思捷三大『股皇之皇』到北京奧運就最實際!奧運阿爺點會俾個市跌? 用吓腦啦!」
2007年騰訊低位23.4元

看似出格, 個人越信要長揸發大達, 第一個需要的條件(necessary condition)是有潛質但「果樣唔多似」。換句話說, 隻股票望落去必須要「肆肆正正」, 但有頗明顯的瑕疵。80-90年代的劉德華, 已經嶄露頭角, 但瑕疵是草根味稍嫌太重, 看似難登大雅之堂, 故經常要扮演「華D」跟「陳刀仔」這類角色。後來越加磨鍊, 去蕪存菁, 多添幾分穩重之氣, 方才達到殿堂級的級數。三國時的曹操, 代兗洲牧時, 其雄才大略已如錐之在囊, 滔滔不絕: 以一千人降復三十萬人的黃巾軍, 收編為「青洲兵」, 成為之後遂鹿中原的本錢。但曹操「在挾天子而令諸侯」之前, 背負的瑕疵頗大。漢代行九品中正制, 信奉「龍生龍,鳳生鳳,老鼠的兒子會打洞」, 先看出身, 後看才能。曹操是太監曹嵩的養子, 出身寒微, 又是問題少年, 自然比「四世三公」的袁紹較難成功。但後來跑出的, 就是曹操這個「唔多似」的奸雄。

反而, 果樣似到十足十, 逢人都認同一定發達, 反而九成九無運行。人人都買, 價錢飛升就像跑馬「落飛」, 就算基本因素不變, 變成大熱門後值博率已經大幅下降。加上偉大的公司就如偉大的名將, 甚少如足球長青樹馬甸尼般一直保持水準。更多是如朗拿度般只在特定的時間爆一段燦爛的業績, 一剎那的光輝等如永恆。中資電訊股, 工業股, 航運股, 中資電力股及出口股版塊內就應該有不少這樣的過氣名股。因此, 自己長線挑股已越多投放時間在「果樣唔多似」的版塊上。